Dagar hlutu viðurkenningu Jafnvægisvogarinnar 2024, sem veitt er fyrirtækjum sem sýnt hafa fram á skýran árangur í jafnréttismálum. Jafnvægisvogin er hreyfiaflsverkefni Félags kvenna í atvinnulífinu (FKA) og er markmið verkefnisins að stuðla að auknu jafnvægi kynjanna í æðstu stjórnunarstöðum íslenskra fyrirtækja og stofnana. Viðurkenningin er mikilvæg fyrir Daga og staðfestir framúrskarandi árangur í jafnréttismálum.

‍

Jafnvægisvogin veitir árlega viðurkenningar til fyrirtækja og stofnana sem hafa skrifað undir viljayfirlýsingu um að jafna stöðu kynjanna á stjórnunarstigi. Verkefnið er mikilvægt í íslensku atvinnulífi og endurspeglar þá miklu áherslu sem lögð er á aukið jafnrétti á vinnumarkaði. Með þátttöku í þessu verkefni hafa Dagar skuldbundið sig til að halda áfram að vinna að jafnrétti innan fyrirtækisins.

‍

„Við hjá Dögum erum afar stolt af því að hljóta þessa viðurkenningu. Hún undirstrikar okkar markvissu vinnu í að skapa vinnuumhverfi þar sem jöfnuður og fjölbreytileiki eru í forgrunni,“ segir Pálmar Óli Magnússon, forstjóri fyrirtækisins. „Jafnvægisvogin er mikilvægur vettvangur til að ýta undir breytingar og við erum ánægð með að vera hluti af þessum áfanga."

‍

Á þessu ári fengu alls 130 aðilar viðurkenningu Jafnvægisvogarinnar, sem sýnir að jafnrétti er sífellt stærra og mikilvægara málefni í íslensku atvinnulífi. Dagar fagna því að vera hluti af þessari þróun og munu áfram leggja sitt af mörkum til að stuðla að jafnrétti á vinnustöðum landsins.

‍

Í tengslum við viðurkenningarhátíðina gróðursettu Ingigerður Erlingsdóttir, sviðsstjóri fasteignaumsjónar, og Brynhildur Guðmundsdóttir, sviðsstjóri þjónustu og ræstingar, tré í Jafnréttislundi FKA. Tréð er táknrænt fyrir það mikilvæga skref sem fyrirtækið hefur stigið í átt að jafnrétti. Árlega frá árinu 2020 hafa tré verið gróðursett í lundinum til að heiðra þá sem hljóta viðurkenningu Jafnvægisvogarinnar, og undirstrikar þessi athöfn skuldbindingu fyrirtækja og stofnana til að halda áfram að stuðla að auknu jafnrétti í samfélaginu.